Wenn än Blockwart die Gosch halt, kummt was däbei raus  (Mannheimer Dialekt)

 

 

Isch schreib heit in moiner Muddersprooch.

Eigentlich isses jo moi Vaddersproch. Der is in dä Neckarschdadt ufgewachse un

gebore in dä Alphornschdroos. Moi Mutter is aus Verne kumme und ufm

Pfingschdberg groß worre. De Unerschied im Neckarschdadter Monnemerisch un dem

Pfingschdberger liegt fer mich klar uf de Hond, obwohl alle sage, sie dede

Monnemerisch babble: die äne gehe in die Kirsch sunndags un die onere in die

Kersch.

On die Alphornschdross konn isch mich sogar noch so

ä bissl erinnere. Do hot moi Oma gewohnt. Owe im ledschde Schdock im Eckhaus

Alphornschdross-Mittelschdross. Do sin im Hausgong bis on de letschde Treppeufgang

Schdätreppe hochgonge. Vun dort ab ware es Holztreppe un die hawe geknirschdt

bei jedem Schritt. Mensch hab isch do immer Ongscht ghabt als Kind.

Genau wie beim Unkel Jakob in de Dammschdross. Do hab

isch ah immer Ongschd ghabt, drauße ufm Balkon, wo ma niwer gucke gekennt hot

uf de Bunker, wo noch Leit drin gewohnt hawe. Wenn isch on der Hond vun moim

Vadder uf den kläne Balkon raus bin, hab isch immer gemeent isch fall runer.

Moin Vadder hot mir erzählt, in der Alphornschdros

wäre se sogar ausm Fenschter geklettert und ufm Dachkondel gsesse als Kinner.

Wo er mer dess erzählt hot, hab isch noch nochträglisch ongschd ghabt, dass er

nuner fallt. Isch glab awer eher, dass moin onerer Unkel, der Unkel Hoiner, dä

Ältschte uner dä Brieder, do drauße rumgeklettert ist. De Unkel Hoiner war donn später ah im Zirkus

als Artist, ‘Bruxello' hot er dort mit soim Künschtlernome gheese.

Vun de Alphornschdross hot mer moin Vadder ah die

Gschicht erzählt, wie er im Krieg uf Fronturlaub hämkumme is und donn war

plötzlich Fliegeralarm. Alle sin se in dä Keller gerennt, moin Vadder un moi

Mudder ah. Die hot nämlich mit moine äldeschde Gschwister, dem Karlhoinz und dä

Christa, bei moiner Oma un moim Opa gewohnt domols, wo moin Vadder in Russland

war.

Also, die ware alle im Keller. Und uf ämol hot so

ähn Blockwart gerufe: "Bei Höges brennt noch Licht."

Die Höges ware sich awer alle sicher, das se des

Lischd ausgemacht ghabt hawe. Und des hot moin Vadder dem Blockwart ah gsacht.

"Do brennt kä Lischd", hott er gemeent. –

"Doch do brennt Lischd. Ich hab's gsehe."

"Nix, des Lischd is aus." meent moin

Vadder.

"Do brennt Lischd. Gehe se nuff un mache se

des Lischd aus."

Moin Vadder hott erschd gar net weiter druf

reagiert, hot er mir erzählt. Des war ihm eigendlisch zu dappisch gewese, weil er

genau gewisst hot, dass er owwe alles ausgemacht ghabt hot. Un außerdem ware

die Bomber schun do un drauße isses iwerall oigschlage.

"Do brennt Lischd.", hot der Blockwart widda

gerufe. „Mache se des Lischd aus, Höge,

oder isch meld sie."

Do hots donn moim Vadder gereischt.

"Gut,“ hot er gemeent, is ufgstanne, hot sich

mit soim Klunker on der Uniform vor dem Blogwart uffgebaut un die Nullacht gezoge.

"Des Lischd is aus, des wees isch genau. Isch

geh jetzt do nuff, awer du gehschd mit."

Un donn hot er den Blockwart gezwunge mit ihm nuff

zu gehe in de letschde Schtock. Do war natierlisch alles aus, un der Blockwart

hot sich fast in die Hosse gemacht.

Passiert ist moin Vadder domols awer nix. Der Kerl

is ruhisch gebliewe und hot’s net gemeld. –

Un wenn isch heit so dodriwer nochdenk, hab isch bloss deshalb uf die

Welt kumme könne, weil so ein Blockwart endlich ämol die Gosch ghalte hot.